Soarer 的 IMO 2005 遊記

11-07-2005

香港隊出發。之前果晚我無訓，為既係盡快適應時差。係機場無乜特別，又係影下相咁就上左機。

香港->東京->墨西哥城(經溫哥華)->梅里達城

機程加加埋埋成廿個鐘，真係幾難頂。因為仲未比賽，所以係飛機度不外乎做shortlist (之前幾年既候選題目)、訓覺、睇戲、打機…

由東京去墨西哥城既飛機好不幸咁延遲左，令到我地趕唔到去梅里達班機。於是JAL俾我地係墨西哥城既Fiesta Inn住一晚，第二朝先去梅里達。

係Fiesta Inn 食既野都有墨西哥風味，例如墨西哥既飽tortilla，點都比飛機餐好。食完之後蔡潤培同潘銘峰去訓。其他人打橋牌同UNO到四點至散。我同鍾安業做多一題”Old and new inequalities”既不等式先訓，所以五點先上床訓覺。

 

12-07-2005

大概十二點我地就到左梅里達城。一出閘就見到來接我們的大會人員。大概一點幾我地就到左參賽者入住既酒店Holiday Inn，Bobby 就過去Hyatt Hotel。入到去酒店就見到今年香港隊既導遊Mirna坐係度等緊我地。佢見到我地，除左問名，吹下水之外，就係同我地講五點要準時出席開幕禮。過左陣，Bobby過埋黎同我地影張香港隊相，咁我地就各自返房為聽日既比賽做準備。

開幕禮係Teatro Merida 舉行。基本上無乜特別。開始既時候有D教育部既人出黎致辭。由於我地聽唔慣墨西哥口音既英文、加上佢地成日講西班牙文同埋個場館非常悶熱，我地唔係訓覺，就係問Bobby拎其他國家既選拔賽試題做。90個國家既參賽者上台掀起左高潮。好多隊都係度搞gag。例如日本係度玩一樣野(唔知叫乜名，大概係一舊木加一粒波，郁一下就令粒波返去木既凹位)，亦有好多隊派餅乾等等既小食或小玩意。

開幕禮之後，各人都返房做下數就訓覺。

13-07-2005

第一日比賽。

同做選拔試既策略一樣，一開始就做不等式，雖然今次呢條放左係第三題。做左半個鐘做完。第一題係要證共點既幾何題。一向以黎，我都係得果三招：ceva定理、 radical axis 同false position。最後爆左五版三角做完。第二題係代數數列既題目，戴上左個數論既面罩。呢題唔太難，所以諗左一段時間都做到。用左好多時間去重寫1、2題既解答，因為寫得太亂，點樣都要穩陣拎到14分。

剩低大概15分鐘果陣係度休息。

剩低大概10分鐘果陣檢查多一次第三題既答案，先知道大鑊。臨急臨忙之下乜都諗唔到，死左。第一日大概以14分告終

出到黎好似大家既成績都唔錯。除左王昭為知乜事竟然做唔到幾何之外(佢係幾何既能力遠超其他五人)，蔡潤培做到晒，有三個人做到兩題，很不錯呀。見到Bobby之後佢話中國隊個副領隊見到份題目就話1、2 太淺……..

下晝我同蔡潤培都話要去買圓規，於是Mirna帶我地同Bobby出去對面既Sanborns，點知根本就無。於是我地去左Walmart 買圓規。去到Walmart 我地先大概知道墨西哥既物價。墨西哥既飲品遠比香港便宜。一支10L既橙汁只售30披索(1 HKD ~ 1.135 披索)。但係其他野就貴好多。

走既時候個天好似玩野咁，落雨大到死。我地被迫滯留係Walmart 出面。等到雨細d 既時候，我地嘗試返酒店，先發現墨西哥道路既排水系統係幾咁不濟。一條路已經變過係小河。其他路亦「不遑多讓」，水浸到死。我地過左一條馬路之後，過河又唔係，唔過又唔係。呢個時候，天又落大雨，趕我地返Walmart 果頭。結果我地係Walmart出面打橋牌打到雨停先走。

14-07-2005

第二日比賽。

因為自己較強既代數題目已經出現，尋日已經預計今日有組合題, 無代數題，換言之，今日死硬。所以賽前無乜期望。

第四題係好淺既數論題目，好快做完。

第五題要求證明一點既存在。香港隊做到呢題既另外二人(許子岳同蔡潤培) 都係知道呢點係AC同BD既垂直平分線既交點，所以易做好多。我雖然已經用左圓規(好耐無用過..)，但係仲係估錯點，做左一個鐘先知出事。不過，個諗法 (用ptolemy定理 + 死爆)仲用得，最後三個鐘內完成呢題。到考完我仲唔知果點(X)係乜，不過就知道PX 同CD交點X’ 既位置 (搵到CX’/DX’)。換言之，我只係確認到X 係PX’ 上面(PX’ 上面有點X 令到無論E,F 點郁，PX 都係常數)。解答好樣衰，不過7分都係穩陣既。

因為第五題用好來時間，我得返半個鐘做第六題。我組合一向好弱，又觀察唔到D乜野，所以果半個鐘吹既野都係廢既。預計呢日都係拎14分。兩日加埋大概28分，大概係銀牌。

出到黎知道許子岳發威，做到晒三題。王昭為仲係炒左。今日連鍾安業都炒埋。潘銘峰，蔡潤培同我都係兩題。

食午餐既時候Mirna極力游說我地去D洞穴度游覽。佢話D洞穴好靚呀，有水游呀等等。結果呢一番說話昆左我地去果度「玩」，亦促成一次難忘既洞穴之旅。

搭左成個幾鐘車之後，我地就轉車–轉去馬車度坐。原來我地今次會由馬車載我地去游覽三個山洞。雖然天空滿佈陰霾，但既然黎左，都無理由唔去架。搭左好來車之後，就到達第一個山洞。

去到時候開始落大雨。基本上，呢個山洞無乜野睇。入面只係有個好大既湖(靚)，同埋一堆蝙蝠，間唔中見到佢地飛。之後，我地又繼續向第二個山洞出發。由於雨好大，有d不知名既生物不斷煩住我地，加上架車既簷蓬有好多窿，我地非常狼狽。到達第二個山洞既時候，雨勢稍微減弱，好多人就除晒衫話落去游水。澳門隊有兩個落左去，我地就有四個落去。唔游既人係附近既一個亭仔避下雨。呢個時候，無人唔係全身濕晒。呢樣都唔緊要，最慘既係重要證件濕左。(好似潘銘峰本護照濕左)

過左大概半個鐘，游水既人上左黎。導遊話可以俾人早走先。香港隊同澳門隊都即刻話走。上返馬車之後就好快開車。呢程車令人非常難受，因為之前遇過既飛蟲數目更多。呢種飛蟲咬完人之後會令人覺得有D痛，但係過左十幾廿分鐘又會無事。本來，被呢d 野咬下痛痛地都無乜所謂，但係我地都好驚呢D蟲咬完人之後會令人病，咁就可能好大劑。

係車上既時間可以話係折磨。拉我地既馬可能太疲累，成日行唔郁，將折磨既時間倍增。用左好來時間我地先返到車。我已經全身濕晒，幾乎冷親，偏偏又無衫換。架車又唔開住，話要等埋其他人先。由於車程頗長，返到酒店果陣已經好晏。我即刻上房沖涼，個人先精神返，應該無冷親。

果晚，劉志軒，Bobby同埋Dr.chan 都走左上黎。佢地都睇過一次我地既答案，估計左一下我地既分數。蔡潤培大概35，但係第一題可能7可能0。許子岳大概30，我大概29，鍾安業大概22，潘銘峰大概16，而王昭為就大概1-2。 佢地又話今年份卷比較淺，35都未必金。我同許子岳既銀都好危險。無論如何，比賽過左就唔諗啦。之後Dr. chan 走先，劉志軒, Bobby 同我地六個玩有懲罰既UNO–輸左要做十下掌上壓。結果，果晚劉志軒做掌上壓都做到變成大隻佬~ XD

15-07-2005

上晝我地去左Dzibilchaltun，一個瑪雅文族既古蹟。其實成個游覽都無乜特別，不過我地都見識到外國文化–佢地好鍾意游水。係古蹟入面既一個人工荷葉池，有唔少人係度游水。好多人係無泳褲，無衫換都照落水暢泳。

下晝我地去左Progreso，一個泳灘。係果度食左午餐之後，我地打左陣橋牌就落去玩水。除左潘銘峰唔落水之外，其他五個人，包括唔識游水既鍾安業同我，都落左去玩。果度應該係墨西哥灣，我地一嘗海水既滋味。我成日飲到d 海水，同埋被水整到隻眼，不過係適應左之後都好好玩。

最初，有人提議去「追擊」澳門隊。許子岳同王昭為都用相機去搵澳門隊既行蹤。終於，佢地搵到澳門隊，仲放大十二倍好肯定咁話係佢地。於是我地五個就追出去諗住玩澳門隊。當我地逐步逐步接近同包圍佢地既時候，我地先發現我地一直都跟縱錯人–之前搵到既其實係南韓隊。之後，我地再發現澳門隊根本就無落過水…… ^^” 於是我地唔再理佢地，實行係海度水戰。玩到咁上下，我地就上岸打橋牌同等d衫乾。過左陣，Mirna 問我地玩唔玩聽日既小型比賽。我地可以踢波，打波(籃球/排球)。我地決定同澳門隊組隊參加籃球比賽。

係臨走既時候，我地同摩洛哥隊吹下水，仲影埋相。

返左酒店之後，我地都係玩下橋牌、象棋同UNO。港隊麻將仲未出動呢。

16-07-2005

今日我地去Salvador Alvarado Park 玩。呢個公園無機動游戲，但係有D我地從未玩過既遊戲。其中一個係係氣塾擂台上「比武」。比賽雙方各企係一個會轉同震既台上。呢個遊戲最難既地方就係穩，因為係果個台上面係好難企得穩既。見到呢個擂台之後，我地都躍躍欲試，但係我地無邊個真係可以係果個台上面企得穩，所以好快輸晒。

過左陣之後，我地過左去籃球場果面。由於澳門隊淆左底，我地又唔夠人，於是就搵外援。第一場我地搵左希臘隊幫手，結果慘敗，主要因為身高上輸蝕。第二場我地就同阿美尼亞隊既其中一員一齊作戰(後來知道佢係，結果唔知嬴定輸呢..

一輪運動過後，大家就走去做小手工。蔡潤培、許子岳同我都為一D手工藝品上色，而其他三人就走去玩飛碟。蔡潤培上完色之後我地就去食午餐。今次既午餐比較難食，唔太開胃呢。食完飯，個天又落雨。Mirna走黎話我地可以選擇走先。係走之前，我地買左一D手信。許子岳同我就玩整木製模型–我地只需要係沿住預先整好既木版上既線條，將唔同既組件界出黎就可以。呢個步驟看似簡單，實際上亦花左好多時間。搞掂之後我地就返左酒店玩。

到夜晚，劉志軒同Bobby上黎同我地講講Coordination既事。Bobby 以「轉筆」絕招幫蔡潤培第一題拗到7分。潘銘峰第一題都係拗到7分，但係佢漏做一個case 既第6題就只得4分。最後分數都確定晒，劉話蔡潤培應該金，許子岳同我既銀都幾穩陣，因為今年3、6俾得緊，好難俾一兩分。事實上，係咁多參賽者入面，無人係第三題拎到3、4或5分。潘銘峰25分，銀牌就燘少少。鍾安業既銅牌都幾穩陣。

劉志軒同Bobby後來再上黎，一黎就話 「39都金到」，蔡潤培即刻比佢嚇死，不過原來只係玩野。金銀銅既分數線分別係35、23、12。香港隊1金3銀1銅，排名第17，平左香港既紀錄。不過如果唔係王昭為炒左既話，香港應該入到頭15。

17-07-2005

原定成日都係Chichen Itza，但因為颱Emily既關係，我地只會出去半日。

chichen itza 其實係一座古廟，都無乜野特別，較為有趣既只係兩件事：導遊與購物。

1. 導遊

係車度既時候，已經無乜人理個導遊。成程車得佢一個齋up。去到Chichen Itza 既時候，Bobby叫我地跟住個導遊。去到一棵聖樹下既時候，就聽到佢係度嗔 I don’t really care if you do not listen, I don’t care! 之類既說話，搞到我地都好想笑。

當佢介紹完Chichen Itza 既時候，佢俾十五分鐘我地上金字塔頂再落返黎。當我地過去既時候，Bobby 都唔係好妥佢，因為佢講野真係好悶。之後，我地當然無再理佢啦，自己想點行就點行，不亦樂乎。

2. 購物

係果度既地攤買野，不得不同攤主講價。大家都大講特講。我買一D細既塔仔，佢開價成20披索，鬼理佢咩。不過最後我都蝕左，用$30買左三個塔仔，之後去第二檔昆個攤主話我用$5一個既價錢買既。佢度左好來之後肯用呢個價錢交易，於是我用左$20買多四個塔仔。後來我想用$2黎同個攤主講價，不過睇黎呢個價錢過左火，個攤主不為所動呢。

旅程途中亦睇過各國既分數。Moldova幾乎全隊炒晒，唔知乜事，只係整低MDA1 滿分再加第三題得到特別獎。全部人加埋有17個滿分，由此可見今年份卷比往年易好多…中國隊四個滿分、一個35分同一個32分成功衛冕。美國、俄國緊追其後。美國的成績令人奇怪。係缺少華人既呢一年，佢地係亞太區數學奧林匹克(APMO)既成績大跌，頭十名的總分比香港還要低(參加APMO既都有代表隊級數)，所以我同王昭為對今次佢地成績咁好都非常意外。越南則慘遭滑鐵盧。佢地全隊只有一人係最淺既第四題得到7分，其他人非二即一，令人意外。而印度這支老牌強隊的排名跌至三十六，只有一人得銀牌，亦嚇左我一跳。

下晝返到房就見到張通知，要求我地係八點前將行李放晒入廁所，再拎枕頭+被落去下面既Gran Salon訓。順便聽到因為Emily既關係，閉幕禮將會取消。

八點落到去，成間酒店既人都係度。大概係玩左幾日大家都玩到有D厭，所以走返去做下數，再玩陣UNO咁。夜晚我好早就訓左。到5點幾果陣醒左走出去大廳，見到好多人坐係度，大概大家都期待住個風呢。不過，到5點幾都可以坐係度，證明我地都無乜事啦。果然，個風轉左向，唔會正面吹襲我地，真係又開心又失落。

18-07-2005

原本取消左既閉幕禮又再搞返，搞到我地又要拎番套西裝出黎。

閉幕禮都幾有趣。先係一輪聽慣聽熟既說話，然後係頒獎，跟住係表演。表演環節入面，大家都好興奮，好多人出左去唱歌、跳舞。香港隊就走出去先，拎住D 牌影相，又同中國隊、台灣隊、澳門隊影相。之後就返左酒店。

中國隊既導遊叫我地11:30 落去同人交換下聯絡。原來大會取消左Banquet後用一個party取代之。係果度香港隊又唔想入去跳舞，搞到唔知做乜咁…之後上房執野，因為我地凌晨4:30 就會走。執晒野之後大家一齊打牌，打打下就訓著晒…

去到機場先知發生大問題。由於我地黎果陣趕唔切梅里達城果班機，Bobby同我地六個check in唔到機票。結果航空公司放左我地落waiting list。最後，許子岳、Bobby搭另一班機趕去墨西哥城，但係趕唔切。我地其實都趕唔切，一到步就衝衝衝，好彩搞掂。航空公司知道我地有兩個人會趕唔切班機，但係就抽錯人，抽起左Dr. Chan 同Bobby張機票，以致Dr. Chan都要濟留係墨西哥城機場。最後，Dr chan、Bobby同許子岳會係墨西哥留一晚，聽日先返。

我地趕上左往東京班機之後就無乜特別。劉志軒加我地五個係十點五到達香港機場，影下相之後就完左今次IMO之旅。